Nahulog, at 'di na makaahon,

Para kang bangin na 'di ko matanaw ang dulo

Alam kong matarik ngunit ninais kong tunguhin

Tulad mo,

Alam kong komplikado, ngunit sinubok kong suyuin

Bakit nga ba ganito?

Hindi ko maintindihan

Na kahit ako'y iyong ipinagtabuyan,

Ninanais ko pa ring bumalik sa iyong harapan

Nabubulagan lamang ba o sadyang totoo na,

Nararamdamang pagsinta, 'di na maitago pa

Abot kamay na ngunit 'di kayang abutin,

Para akong lupa, at ikaw ang bituin

Wala akong pakialam

Kahit na ano pa ang iyong nakaraan

Iniibig ko'y ikaw,

Hindi na kailangan pa ng dahilan

Binibini, ako'y hindi makata

Ngunit hayaan mong iparating ko sa'yo

Ang mga salitang nabibigkas ko lamang

Sa pamamagitan ng tula

Dila ko ma'y nauumid sa pagsambit

ng aking nadarama,

Tantuin mong ako'y 'di nagpapanggap,

At umaasang sayo'y maging karapat-dapat.