Paa, Tuhod, Balikat, Ulo

"Paa, tuhod, balikat, ulo..."

Unang kantang natutunan ko

Pero alam mo bang kanta ko rin ito para sa'yo?

Paa.

Pinapangarap kong darating ang araw

Na makikita kitang naglalakad

Patungo sa akin, patungo sa Dambana

Makayari'y sabay tayong lalakad palabas ng Simbahan

Magkasamang maglalakbay, magpakailanman.

Tuhod.

Pinapangarap kong sa harap ng Diyos sabay tayong luluhod

Ang ating mga panalangi'y sabay nating iluluhog,

Pinapangarap ko ring sa harapan mo'y lumuhod

At isambitla ang tanong:

"Maari ba kitang maging ginang at ako ang maging iyong ginoo?"

Balikat.

Pinapangarap kong ika'y sumandal sa aking balikat

Humimlay sumandali, managinip at mangarap

At sa pagdilat mo, binibini, ikaw sa 'kin ay yumakap

Hindi ka bibitawan, at laging pangangalagaan.

Ulo.

Pinapangarap kong mahalikan ka sa noo

Patunay na ako ay tapat at totoo,

Ngunit madalas napapaisip ako,

Ni minsan ba ako'y sumagi sa balintataw mo?